AGO FLT: Ekipp ëmm Präsident Claude Lamberty bestätegt
AGO FLT: Ekipp ëmm Präsident Claude Lamberty bestätegt
E Freideg den Owend huet déi national Tennisfederatioun (FLT) hir uerdentlech Generalversammlung zu Bierden am Centre Culturel « A Maesch » ofgehal. Hei gouf d’Ekipp ëmm de President Claude Lamberty fir déi nächst 3 Joer bestätegt.
D’FLT zielt mëttlerweil ronn 13.000 Lizenzen. Hei konnt am leschte Joer an allen 3 Sportaarten, déi mëttlerweil an der FLT regruppéiert sinn, nämlech dem Tennis, dem Padel an dem Pickleball, e weidere Wuesstum verzeechent ginn.
Zu de Prioritéite fir dat neit Mandat zielen Investissementer an Infrastrukture fir den Tennis, de Padel an de Pickleball. Dës Investitioune sinn absolut noutwendeg, fir hei weiderzekommen, ass de Verband allerdéngs op déi lokal an national Autoritéiten ugewisen.
Eng weider Prioritéit ass et, den Developpement zesumme mat de Veräiner ze verdéiwen. Hei stellt d’Federatioun Gelder zur Verfügung, fir verschidden Zieler gemeinsam ze erreechen. Zu den Zieler zielt de Recyclage vu benotzten Tennisbäll, fir den Tennis méi nohalteg ze gestalten, awer och d’Promotioun vum Arbitrage, vun internationalen Tournoien (ITF, Tennis Europe), vun deenen d’Lëtzebuerger Spiller kenne profitéieren, vun neie Lizenzen am Juniorsberäich souwéi vu Padel-Tournoien, engem Interclub a Schoulprojeten am Pickleball.
2024 konnt d’FLT eng Persoun astellen, déi fir den Developpement, d’Formatioun an d’Kommunikatioun tëscht Verband a Clibb zoustänneg ass. D’FLT ass optimistesch, sech kënnen 2025 weider ze professionaliséieren.
Als 53. Veräi gouf um Kongress de Padel Club Luxembourg City an d’FLT opgeholl. Weider gouf ofgestëmmt, dass d’Finalle vum Interclub-Championnat 2025 beim TC Nordstad wäerte stattfannen an d’Generalversammlung d’nächst Joer beim TC Iechternach, deen dann 100 Joer feiert, ofgehal gëtt.
| Déi nei Zesummesetzung vum Conseil d’administration | ||
|---|---|---|
| LAMBERTY Claude | TC Howald | President |
| RICHARTZ Chris | TC Nordstad | Secrétaire général |
| STEGMANN Markus | TC Howald | Trésorier |
| BERNA Charles | Tennis Spora | Membre |
| DEGREGORI Karine | TC Senningerberg | Membre |
| FELGEN Jemp | TC Husen | Membre |
| FELGEN Laure | TC Husen | Membre |
| GELHAUSEN Marc | TC Nordstad | Membre |
| PASTORET Cathy | TC Esch | Membre |
| PEPIN Claire | TC Esch | Membre |
| SCHAUL Claudine | TC Arquebusiers | Membre |
| SCHILTZ Denise | TC Schifflange | Membre |
| SCHLECK Christian | TC Arquebusiers | Membre |
| WELTER Mike | TC Grevenmacher | Membre |
| WIRTZ Tom | TC Grevenmacher | Membre |
| Déi nei Zesummesetzung vum Tribunal fédéral | |
|---|---|
| ENGELHARDT Alain | TC Howald |
| HOFFMANN Joe | TC Bissen |
| PFISTER Laurent | TC Belvaux |
| RATHS Tom | TC Sandweiler |
| ROLLER Marc | TC Schuttrange |
| SCHWARTZ Anne | TC Arquebusiers |
| WEBER Caroline | Tennis Spora |
